Friday, 3 March 2017

gen Nicholas Williams

Gool Peran gen flowrys teg.
Adro dhe amal an bath udn puns, versyon rag Kembra, y hyllyr redya an geryow Kembrek PLEIDIOL WYF I’M GWLAD ‘kerenjedhek ov dhe’m pow’ dhyworth cân nacyonal Kembra. Wàr fâss an bath yma gwelys kenynen pò ‘leek’, plans kenedhlek an Bensevygeth. Saw hedhyw i’n jëdh yth yw an afodyl pò daffodil aswonys yn fenowgh avell flour nacyonal Kembra. Yma an dhew blans ow longya dhe’n keth teylu, saw dre lycklod an kebmysk intredhans a dheuth dhyworth hevelenep aga henwyn, rag in Kembrek ‘leek’ yw cenhinen hag afodyl yw cenhinen Bedr ‘kenynen Peder Sans’. Yma an ger afodyl wàr an tenewen aral ow tos dhyworth Grek asphodel, hag in Sowsnek an Osow Cres yth o ûsys rag styrya kenynen. Ny dhalathas an hanow referrya dhe’n flour teg melen ma’s bys in dyweth an whêtegves cansvledhen, pàn vedha afodylys drës dhe’n Vreten Veur in nùmbers brâs dhyworth an Powyow Isel. Hèn yw an rêson rag an d orth dallath an hanow arnowyth daffodil, rag an d ena yw versyon cot’hës a de, ger mell pò definite article in Iselalmaynek; daffodil ytho yw ‘an afodyl’. Hanow sciensek an afodyl yw Narcissus. Herwyth an Grêkys coth Narcissùs o gwas yonk pòr semly esa lies huny in kerensa ganso. Saw pàn welas ev y skeus y honen i’n dowr, ev a godhas in kerensa ganso y honen. Yth esa an nymf Echo ow cara Narcissus, mès avell pùnyshment dhyworth Jûnô rag hy bos tavasek, hy a gollas hy hows teythiek; ny ylly hy ma’s dasleverel ger dewetha pùb lavar a glowa hy. Narcissus a spênas oll an jëdh ow meras orto y honen heb predery a berson vëth aral. Indella ev a verwys, saw pàn wrussons whelas y gorf, ny gafsons mas flour teg, an afodyl. Echo druan êth mes a wel kefrës, ha nyns o gesys ma’s hy lev. Pòr deg yw an afodyl in dallath an gwainten gans an flour plegys dhe’n dor kepar ha pàn ve va ow whelas gweles y skeus y honen wàr enep an dowr. Hèn yw an skyla martesen rag an Wydhyly dhe elwel an flour lus an chromchinn flour an pedn plegys’. Nyns usy an afodyl ow pêsya ma’s termyn cot. Yma va ow plejyowa udn jëdh ha ternos gwedhrys yw, tra re beu merkys gans lies prydyth. Robert Herrick rag ensampel a scrif: Afodylys teg, ass on ny trist why dhe hastya in kerdh mar scon. Kynth esoma worth y henwel afodyl, a les ywa nag eus hanow vëth rag an afodyl i’n textow Kernowek. Afodyl a veu benthygys dhyworth Sowsnek Cres ha kenynen Peder yw grôndys wàr an Kembrek. Ken hanow Sowsnek yw ‘lent lily’ ha rag hedna yma radn ow comendya lylien Gorawys in Kernowek. Afodyl yw ow dôwys vy.

No comments:

Post a Comment