Wednesday, 1 March 2017

An dhragon gen Nicholas Williams (KS)

Yth yw an dhragon onen a arwedhyow Kembra.
Yma dew sort dragon i’n bës: an dhragon Ewropek ha’n dhragon Gathayek pò Chinese. Dell hevel y yw anserhak an eyl wàr y gela. I’n Ewrop an dhragon a vëdh dysqwedhys kepar ha best yw y gorf an corf a serpont, y eskelly kepar hag eskelly ughsommys pò bat ha’y arrow ha’y ewynas kepar ha garrow hag ewynas er. Pàn wrella an dhragon anella, yma hy ow tyllo tan peryllys in mes a’y ganow. Yth yw an dhragon rudh onen a arwedhyow Kembra hag yth hevel an dhragon-na dhe dhos wostallath dhyworth an dragons a vedha ûsys gans an Romans in banerow aga lu. Campoll avarr dhe’n dhragon rudh yw kefys in istory Jeffrey Menow, screfys i’n dhewdhegves cansvledhen. Ena y hyll bos redys adro dhe dhyw dhragon, onen gwydn ha’y ben rudh, owth omlath warbarth. Yma an dhyw dhragon ow servya avell tôknys a’n Saxons ha’n Gembrion ha’n dhragon rudh, an Gembrion, a gav an vyctory. An dhragon rudh yw gelwys Y Ddraig Goch in Kembrek hag yma form Gernowek a’n ger-na draig kefys in Kernowek Coth avell dryg. Saw in Kernowek Cres an ger ûsys yw dragon. Yma draig ha dragon aga dew ow tos der an Latyn dhyworth an ger Grêk drakon usy ow styrya ‘best an wolok sherp,’ ow referrya dell hevel dhe vir venymys an dhragon. I’n powyow Cristyon yma an dhragon consydrys yn fenowgh dhe vos tebel-vest, tybyans usy ow tos dhyworth an Testament Nowyth. In Revelâcyon ny a red a’n vatel inter Myhal Arghel ha’n Dhragon: Myhal ha’y eleth a werryas warbydn an dhragon. An dhragon hay eleth a wrug omlath. Saw ny wrussons y overcùmya, naneyl ny veu aga thyller kefys in nev namoy. Han dhragon vrâs a veu tôwlys in mes, an hager-brëv coth, henwys an tebel-el ha Satnas, hedna usy ow tecêvya oll an bës. Hèn yw an rêson, dell hevel, bos mar lies whedhel ow tùchya sens Cristyon owth omlath gans dragons. Jory Sans a wra fetha y dhragon in udn omlath gensy, saw in Beunans Meryasek yma Sen Sylvester owth overcùmya an dhragon gans power Crist. Sylvester a lever:

Dhen dysert me a’s gorr hy
dhen le na yll hy dregyn.
In hanow Crist a vercy
me a’th worhemmyn, dragon
dhen gwylfos quyk mayth ylly.
Avoyd dhyworthyf lemmyn;
drog nefra gwayt na wrylly
dhe vest na den crev na gwann,
na byth moy na dhewhylly
wàr beyn ancow, ty vylen

In Beunans Meryasek ytho exîlys yw an dhragon dhe’n dysert saw nyns yw hy ledhys. Apert yw fatell o Sylvester Sans onen a’n kensa mentênydhyon pò conservationists. Nyns o va whensys dhe weles dylës yn tien sort traweythys a vest.

No comments:

Post a Comment