Tuesday, 31 May 2016

Lever Nowydh gen Alan Kent

Lever bian entitlys Interim Nacyon a godhas e'n box letherow an seythen ma
Piw a wela vy?
heb me dhe wodhvos e dhe voas dyllys. Ma e rebam lebmyn war an bord ha me o scrifa. Thew an kensa cuntel a b
rydydhieth gen Alan Kent adhia pa veu dyllys The Hope of Place: Selected Poems in English 1990-2010. Ma moy vel hanter cans scrîf dhe redya ena, gwersyow a bub sort adro dhe lies mater a vedh dhe 
gan les. Ma redyes genam kenifer ger, me a'n to! Ma Alan o vajya pell, dhe Zealand Nowydh ha Pow America, dhe Frenk ha Breten Vian ha Pow an Sowson – ha whath. Penagel vorr eth a y scrifa, ma Kernow ha'n Kernôwyn ena... ha preder polityk ewedh. Mava o scrifa en pub termyn: an termyn eus passyes, an jedh hedhyw ha'n termyn a vedn doas mar medn nei. Dre bana vorr e vedn nei moas na vo diwedh dhe'n daralla? Ma y ditel o meneges agan stât ha condicyon vel pobel üjy o pewa e'n men termyn vel minorita nacyonal heb boas nacyon officyal - wos cawas or ha tavas ha hanow ha baner ha senedh. Ambos Alan ew ter vedh collenwys an desîr ha'n gorvyn e'n termyn a vedn doas, p'o gwayes an geryow eus ha chanjys aga sens dhe'n tû da. Da ew genam y bolityk bes gwell ew genam whath pa scrif a gan bownas kenifer jorna – an rev hir e'n crow (p100), an blas a Vethodistieth (p31) ha'n sart a veu pernys ganso a'n RNLI rag hanter cans diner en Porth Meur West (p17). Kewgh dh'y redya, keniver onan ahanowgh.

Thursday, 19 May 2016

Losow Me en Kernôwek gen Chris Parkinson

blejow a'n guckow, blejow a'n gog
Adhiwedhes, me a dhiskevras skyllen dort an lever termyn Kembrek Llên Natur, a veu dyllys en Hav 2012. 'Planhigion Mai yn y Gernyweg' o an tîtel. Hen'ew “Losow Me en Kernôwek” Tho pur dhe les ha me a’s gwithas peder bledhen, terebo hedhyw. En kensa le, thera rôl a henwyn Sowsnek – Kernôwek andelma: "Bluebell, Bleujen an gog; Campion, Glusles; Primrose, Brialli; Clover, Mellyon; Daffodil, Lili Korawys; Daisy, Kaja; Gorse, Eythin, Heather, Grug, Honeysuckle, Gwydhvos; Iris, Elester; Lily, Lili; Lily of the Valley, Losowen an Hav; Rose, Rosen; Sea Holly, Morgelyn; Thrift, Bryton.
An scrifer a gemeras an rôl ma dort wiasva Maga. E wrüg scrifa boas spladn havalder an henwyn Kernôwek dhe’n Kembrek. Mava notya henwyn kehaval et an dhew davas, rag sompel Gludlys –Glusles, Gwyddfid – Gwydhvos, Ellesg – Ellester. Nei alja addya Briallu, - brialli, Eithin – Eythin etc.
Bes mava gwil diwedh gens an questyon: “A ble en bes deth kaja, (daisy) ha bryton (thrift)? Tybyansow nebonan?”
N’oram a wrüg ev cawos gorryp dh’y gwestyon en 2012. Metesen ma nebonan en Kernow hedhyw neb a or pandr'ew devedhyans an dhew hanow ma!*
Chris Parkinson

*(An hanow caja a veu scrifys gen Borlase ha bryton ew hanow coth lowr a veu gwithys e'n Sowsnek a'n pow. E'n tû aral, an henwyn glusles ha gwydhvos ha Lili Korawys a veu gwres emann. Nag eus othom anodhans. Neil)

Gerva: skyllen – cutting (lit. shoot); lever termyn – magazine; Kembrek – Welsh; andelma – thus; gwiasva – website; havalder – similarity; kehaval – similar; devedhyans – origin; tybiansow – ideas; nebonan – someone.

Monday, 16 May 2016

Spasporth - Pandra ew hedna?

Ew hedna Trevos a wela vy e'n pelder?
Ma an Governans pedery a Ayrporth Mawgan (Towyn Blista - Kernow) rag an SPASPORTH KENWERTHEK (commercial spaceport) a dal egery warbydn 2018. Ma seyth telher erol üjans madra en Breten Veur, whegh anodhans en Scotland/Alba ha onan en Kembra. Na vedh pell ken nei dhe wodhvos mar peu dowisys Mawgan. Marth via dhe'm dama wydn a veu genes ena, pell an eur ma!
Kevrednow awoles:

http://www.bbc.com/news/uk-england-cornwall-28291392

http://www.bbc.com/news/uk-politics-36303741

Nag ew an kensa termyn a wrüga nei danon tüs awarra:
https://www.youtube.com/watch?v=CIqO5Gr87dE

Thursday, 12 May 2016

Keslôwena Porth Ia !

Consel Porth Ia a venja gwil neppeth dhe weres pobel an pow na ellans perna treven en costys na. I a venja oll an treven a vo derevys e'n termyn a vedn doas dhe voas ambosys dhe bobel a'n pow dre reyth. 'Covenant' vedh gwres a'n ambos na en Sowsnek. An treven a eus lebmyn a vedh war an varhas opyn, whath.

Nag ew Jacob Rees-Mogg lôwen gen an towl.
Moy vel pajar ügens en cans (80%) an bobel en Por'Ia a votyas rag en towl en referendum a veu ornys gen Consel Kernow. An keth tra a veu gwres kens lebmyn rag radn an treven consel a veu gwerthys, saw nag ew an laha crev ha stroyt lowr. Nei oll a or fatel ew an tacklow en Por'Ia ha porthow erol a'n pow. Scant nag eus Kernowyon veth a ell moas en cost an treven. Dar, telher rag üdn carr a veu gwethys rag moy vel hanter cans pens, whath nag ew pell ! Ma pernys brossa radn an treven gen pobel dhort a'n citys pell, heb gara telher veth rag an bobel en Por'Ia, lebmyn a veu gwerthys treven an consel - lies anodhans - ewedh. Pub
Moy vel 80% rag an towl.
bledhen e vedh gwelys treven nowydh po 'exclusive executive homes' rag pobel rych en üdnek. An media a dhallathas madra an dre pa veu derevys
The Tate en gwil Por'Ia dhe voas vôg po costen esy rag displegyoryon ha prenoryon treven ha aventuryors a bub ehen. Gerow nei dhe wormal an consel ha ga scodhya war an vorr. Ma radn a venja ga lettya, rag sampel, an senedher Tory, Jacob Rees-Mogg dhort Gwlas an Hav, bes nag on brag na holan, cowetha vy, ha'n golanes en Por'Ia a or pele scumbla.


St. Ives is Porth Ia, named after a female saint, not Yves. We tend to drop the th.
Gerva: derevys: raised, built; ambosys: promised, pledged (in this cas by covenant); reyth: law, legal act ~ deed; ornys: organized; stroyt: strict; moas en cost: afford, go to the expense of; vôg or fôg: focus (often meaning a blowing house for tin in place-names like Vogue); costen: target; dhe wormal (<gormal) congratulate, praise; scumbla: to shit (of birds).
Lavar: Nag on brag na holan 'we are neither malt shoots nor salt' means 'we are not easily spoilt', 'we are not fragile'.


Saturday, 7 May 2016

Telores gen Chris Parkinson

Telor an helyk
War an diwedh mis Me ew devedhys ha ottobma gwenton po nag ew hav! Kens en vledhen ma, en mis Jenwar, nei a glowas coan an rüdhek ha òja hedna, an vola dhû ha’n vola loos a dhallathas cana. En mis Meurh martesen, whei a glowas an golvan ke ha’n tink ishyon. Ma oll an edhyn ma trigys dres an vledhen en Wlascor Ûnyes. Trigoryon ens (residents).

Bedn diwedh Mis Meurh, ma edhyn erol o toas dhe'n pow. ‘Havyjy’ (summer visitors) ens, bes edhen kens es pobel!  Piw ens, an re ma? Pub hüny, ogasty, a or an gwenely (swallows) dhe dremen (migrate). Mons toas obma en gwenton dhe wül ga neythyow ha moas tre dhe Africa en kidnyadh òja maga ga edhnigow (chicks)Na whath, ma lies edhen aral o toas obma, rag maga edhnigow, ha amesk anjei ma üdn bagas ew pur dhe les. Hen'ew the warblers en Sowsnek ha'n telores en Kernôwek. Ma radn en Kernow ga creia anjei ‘canoryon’ bes ma lies edhyn o cana. Bagas specyal ew an telores ha rag hedna anjei a dal cawas ga hanow ga honan. Ma an ger ‘telora’ o menya ‘to warble’.

Termyn me veu flogh, na oyen traveth o tochya telores. Na wrüga vy besca ga gweles anjei. Martesen me a glowas anjei, heb godhvos. Bes pur dhe les ew doas dhe ajon bôwnas gwels an pow adro dhen et agan tiredh gan honan. So, rag fra na wrewgh whei dalla an vledhen ma dhort diskevra onan a’n telores, rag sompel ‘telor an helyk’, the willow warbler. Res ew dhewgh moas dhe wiasva an RSPB (keveren awoles) dhe weles fatel ew favour an edhen ma, ha fatel üjy o cana. En cott termyn, whei wra gweles fatel ew kebmyn, ha y glowes en pub tû.
Obma rôl a delores erol a vedh dhe weles ha clowes en Breten Veur an hav ma. Martesen whei wra gweles onan a’n re ma awedh.
Chons da! Chris Parkinson

Rol

Cetti’s Warbler Telor Cetti; Sedge Warbler Telor an Cors; Reed Warbler Telor an Kersek; Dartford Warbler Telor an Eythin; Whitethroat Lonk Wydn; Blackcap Telor Pedndû; Chiffchaff Chiffchaff; Willow Warbler Telor an Helyk; Wood Warbler Telor an Coos; Garden Warbler Telor an Gilly; Aquatic Warbler Telor Marhas Jôwan; Grasshopper Warbler Telor Logojen