Wednesday, 31 December 2014

Beatrix Potter en Kernowek



Ottobma dhewgh keveren dhe lever nowydh-treylyes gen Eddie Climo ha dyllys gen Gwask Orlewen. Scrifys ew en Kernowek Unys saw na vedn hedna gan gwitha dhort y redya. Keslowena Mr. Climo! Whei ell y sawya an pdf heb arveth veth! Meurastawhei sara wheg! Neil

http://www.lulu.com/shop/beatrix-potter/52-jynjyber-ha-kyfythek-ginger-and-pickles/ebook/product-21976394.html

Monday, 29 December 2014

Spladn che steren vian, spladn


Twinkle Twinkle Little Star – en Kernowek

Spladn che steren vian, spladn

War an mor ha’n dor en dadn

Dres an cloudys, otta che

Cara jowel terlentry

Spladn che steren vian, spladn

War an mor ha’n dor en dadn

Wednesday, 17 December 2014

Na wrewgh eva re gen William Allen c.1704

SWF L version followed by William Allen's original spelling.
 

Na wrewgh eva re (Na reugh eva re)

Mes eva rag as sehes (Mez eva ra guz zehaz)

Ha hedna, moy po le (Ha hedna, muy po le)

Vedn gwitha, corf en ehes (Vedn gwitha, corf en ehaz)

 
Do not drink too much but drink for your thirst and that, more or less will keep body in health.


 


Sunday, 23 November 2014

Kernowek en Resulyan : Cornish in Bridge (Illogan)

Nessa de Merth (24 mis Whevral) ew an termyn rag Kernowgoryon, broas aga sehes, dhe vetya warbarh en Tavern Pons Resulyan (Bridge Inn, Illogan) ogas dhe Portreth dhe eva badna cor po gwin ha clappya Kernowek. Straft òja hedna (dhe 9 eur, moy po le), an cür Tereba Nessa a vedn practysya e’n keth teller. Mar medna whei - kebmys ahanowgh nag ew esely an cür - doas abres (come earlier), welcòm whei a vedh.

Saturday, 22 November 2014

Peder ha Wella gen Albert Men


Wella: Metin da, Peder. Spladn lowr ew an awal dhe wones e’n erber hedhyw, me a hevel.

Peder: Ea, sos. Gwir ew hedna. Nyhewer (last night) an howlsedhas o teg ha me o kerras dhe’n hal gen o heun (keun: dogs).

 
Wella: Keun, che a lavaras keun? Sür oma nag eus moy vel üdn kei dhis.

Peder: Conoria! Na ores ta dr’ew Jory nebes clav en eur-ma? Rag hedna, thera vy o qwitha (< gwitha) an kei ev genam nebes dedhyow.

Wella: Peder, tho che, heb dout, an gwella kentrevek (neighbour) en Kernow.

Peder: Na, na, theram o cara keun, bes ma neppeth a vaddama loal dhis. Nyhewer, dhe bedn an vownder, me a dheuth bedn mab Hecka leb a gomplas neppeth pur goynt dhebm.

Wella: Ria, ria, Peder! Eus fout a skians dhis? Nei or pur dha, keniver onan ahanan, dr’ew mab Hecka an brassa clappyer hanter gow - hanter gwir et agan plew! Scant na ella nei crejy tra veth üjy leverel. Y sira ev a’gan gwarnyas nanj ew pell. Gwell via che dhe nakevy y lavarow ettien, ha whare, en barh Duw!

Peder: Bes Wella, nag eus gow vith itna an termyn-ma. Gortos pols, mar pleg ha me a vedn loal dhis.

Wella: Gaffans dhortes, cothman vy, na dal dhebm strechya na vella. Res ew dhebm cawas an buss dhe’n drev dhe gerhes hor an wreg vy üjy o toas dhort Liskyrres terweythyow dhe spendya an pednseythen gena nei. Lebmyn, res ew dhebm hastya alebma bes na alja nei metya warbarh en tavern gothuher?

Peder: Ea, bes na dal dhis moas mes. Ma ostyades (female guest) dhe whei.

Wella: Gwir ew bes gen clap diw venen en chei na via teller veth rag den na maw. Hagensol, na wra anjei gwil düwon veth po nag era vy ena! Ma fowt dhebm a nebes cres ha powas m’ala vy madra taklow gorow ha sewya tybyanjow o honan!

Peder: A, sos vy, lebmyn therama convethas oll an câss!

Wella: Dewgh genam dhe’n tavern, dhan, ha whei ell cows dhebm a’gas mab Hecka ha nei ell eva gan cor derag an tan rag dhe lenky gwell an drolla!

Peder: Me wra boas ena dro dhe hanter òja seyth. Terebo nessa ha kebmer with!

Wednesday, 19 November 2014

Christiana Tredennick gen Jan Lobb




Genesygeth Christiana Tredennick a veu en mil eth cans pajar warn ügens. Hanow teylû an gour hei o Jacka (hedna ew ‘James’ en Sowsnek).Teylû balweyth o va. Den bal plobm o Tùbmas Jacka. Thera an teylû trigys en Ros, en plüw Lannberan, saw, nag era Christiana trigys en Ros en mil eth cans pajar ügens ha üdnek. Era hei, martesen, e’n Stâtys Ûnys (po en Densher)? Nag era. Thera hei en Towan Plüstry, gen an cottha mab hei leb o marner omdednys. Benyn wedhow o hei. Hy gour a dremenas (posnys gen plobm, martesen), po ev a veu ladhys. Hei a verwas an terdhegves a vis Dû, etek cans pajar ügens ha whetek en Ros. Trei ügens bloodh ha terdhek o hei. “Òja strifow skith an bownans, powes wheg Nev.”


An yonca mab Christiana veu henwys Alfred Jacka. Ev a veu genys en mil eth cans trei ügens ha pemp. Bloodh Christiana o dewgens hag onan e’n vledhen na. Tho Alfred hy flogh diwettha. Termyn e veu whetek bloodh tho y soodh ser predn. Martesen den bal o ev. Thera odhom a bostow ha stullys predn en balyow. Pur dhiantel o an whel e’n balyow. Alfred a verwas en mil eth cans pajar ügens hag üdnek en Butte City, Montana, e’n Stâtys Ûnys. Butte vedha henwys ‘an menedh an moyha rych e’n Norves’. Thera arhans ha cober ena. Martesen e veu droglam an pempes warn ügens a vis Whevrel, po martesen tho ev clàv. Òja ev dhe verwel, martesen, e teuth y dhama tre dhe bow hy honan, dhe verwel ewedh. Nag o Alfred bes whegh bloodh warn ügens. Encledhys ew ev en Butte, bes ma men co’ ev e’n encladhva eglos Lannberan. 

Monday, 17 November 2014

Jacka Rickard - An Barbour Tullys





En termyn eus passyes - termyn me veu yònk -thera trigys et agan treveglos nei üdn barbour lowen o henwys Jacka ‘an myjer’Rickard neb o den ithik wheg ha prest parrys dhe weres dhe biwa benag era odhom dhodho. Thera keniver den en pow adro o moas dhodho, yònk ha coth, bian ha broas, rych ha bohojek ha besca vedha clowys croffol veth adro dhe’n trogh na whath an pris. Thera mebyon hir aga blew o moas ena ha tüs coth, pedn pilys, scant nag era tra veth whath dhe voas trehys -po nag era nei mires barha ga frigow.

Lebma ügens bledhen, pa thera vy ena war an scaval o cortos an torn vy ha redya an Falmouth Packet, còsel ha clor, nebün den, dro dhe dhewgens bloodh, po moy martesen, a dheuth aberh e'n shoppa gen maw yònk, pemp po whegh bloodh, sür lowr.

“Alja whei trehy an blew vy lebmyn, kens es hedhy, serra? Res ew dhebm fistena m’alla vy kemeres an diwettha buss dhe Heyl,” medh an den, hegar y favour.

“Ea, ea, diogel,”medh an barbour da, “Sedho’whei obma en chayr, coweth, ha bedho’whei es.” Ken pell, thera y weljow o trehy ha gwil dhe vlew an den dhe godha en bern dû oll adro dhe’n chayr.

Pa veu gwres an whel, an den a vednas dhor an barbour, “Eus cigarettys gena whei?”

“Na, nag eus. Edrek ma genam, coweth. Nag erama gwerha cigarettys obma, bes e’n nessa chei –henn ew shoppa Mester ha Mestres Oliver - mons gwerha keniver sort a dobacko ha cigarettys ha oll an peth a venja whei rag de Sadorn dhe nos, ewedh”medh Jacka gen meur wharth a’n vebyon.

“Durdala dhe whei! Me vedn gwil endella ha whei ell trehy blew an maw-ma ha me ort y wül,”meth an den, lowen gen an nowodhow ha nowydh trehys y vlew.

An termyn a dremenas ha war an diwa,* Jacka a lavaras dhe’n maw, “Pele ma dha sira, boya? E geth mes rag y cigarettys lebma hanter our po nag ew moy.”

“O! Nag ew o sira vy, an den-na,” medh an maw gen marth, “Besca na wrüga vy y weles kens! Ev a vetyas genam en stret ha leverel, “Venjes ta moas dhe’n barbour genam heb pe diner veth?,” medh an maw. Nena e veu clowys garm gen Jacka,“Venjens dhodho, an lader!” ha nei oll a skydnyas en wharth!

Sunday, 16 November 2014

Petrok ha Pedrog: Üdn sans po dew anodhans? gen Chris Parkinson


(A vocabulary follows this article)


An mis eus passyes an gour ha me eth e’n carr dhe Llanbedrog, en als soth Penrhyn Llŷn en Gwynedd. Me a venja cows dhe oferyas Eglos Pedrog, an Tas Andrew Jones. Ev a’gan gylwis dhe dhoas dhe oferen gres an seythen et y eglos, ha coffy ha kescows o tòchya Pedrog dhe gawas òja hedna. Esy ew tròvya an eglos en Llanbedrog drefen boas hei mar ogas dhe’n treth. An teller a veu ûsyes kensa en wheffes cansvledhen, pa via an morvorrow pur boos. Viajyors venja kens moas war an mor vel dres an tir e’n dedhyow-na. Diwyethek o an servis hanter our, ke thera radn vrossa a’n düs o clappya Sowsnek, bes diwyethek o an levrow servis ewedh. Òja hedna thera bolla coffy ha byskys e’n vestry, hag ena an Tas Andrew a dhallathas derivas dhe nei an tradicyon Kembrek adro dhe Pedrog Sans.

Me oya solabres dr’era scrifys gen Dafydd Nanmor, bardh Kembrek, ‘cywydd’ (a type of strict-metre Welsh poem) leb ma va o tescrifa a’n Pedrog yònk avel soudor a bris, ha ganjo güw hir famos. Bes certan, na ella whei trestya storys coth an sens drefen boas anjei scrifys en Òsow Cres, lies bledhen òja dedhyow an sens ga honan. Rag sompel, nag ew certan piw o sira Pedrog. Warlergh üdn tradicyon, mab Glywys a Glamorgan ewa ha warlergh tradicyon aral, mab Clemens, pednsevyk a Gernow ew. Bes thera nei redya en The Saints of Gwynedd (Miller), “Clemens may be a pseudo- Latinism for Glywys”. Pedrog wrüg dascor bownans pednsevyk rag sewya bownans sans vel managh. Ytho, ev eth dhe Wordhen rag stüdhya, dres lycklod en Glendalough, Wicklow, gen Kevin Sans, medh Fr. Andrew. Òja ügens bledhen, e wrüg doas arta dhe Gembra, ha moas dhe Gernow vel cadnas, gen bagas a gowetha. Anjei wrüg tirya en Laffenek (Padstow = Petrocstow). Godhvedhys en ta ew story ga oberow anjei en cost Laffenek. Ha e’n termen na, Petrok a wrüg prierinses seyth bledhen dhe Rom ha Jerusalem, ha martesen dhe delleryow erel, kens doas arta dhe Gernow en 540 AD leb wrüga va fondya cres en Bosvena.

Bes piw a wrüg fondya settlement Llanbedrog en Llŷn? Dadn an eglos ena hedhyw ma fondacyon coth dadn dhew veter a dewes! Ha mar qwra whei mires ort mappys a’n morvorrow coth, en lever ‘Saints, Seaways and Settlements’ gens E. G. Bowen (1977), whei ell gweles boas Penrhyn Llŷn adal dhe Wicklow en Wordhen, lebma eus Glendalough, tû ha soth dhe Dulyn. A wrüg Pedrog viajya dhe Glendalough ha tre arta dhe’n teller leb ma Llanbedrog hedhyw, poran dres mor Wordhen? Ha òja hedna soth dres Baya Ceredigion, dres tir Sir Benfro, ha war an mor arta dhe heyl Dowr Camel leb wrüg fondya Petrocstow (= Laffenek po Padstow). A wrüga va doas arta dhe Llŷn en termen y bryerinsys seyth bledhen, rag fondya, po nertha eglos en Llanbedrog? Ma Fr. Jones o crejy endella. Certan, nag eus problem gen spellyans an dhew hanow, drefen boas <t> en cres ger ha <c> po <k> ort diwa ger en Kernowek o toas ‘d’ ha ‘g’ en Kembrek. Karen Jankulak wrüg scrifa bewscrif savonek The Medieval Cult of St Petroc’, (2001) bes nag üjy hei crejy boas kevren veth tredh Petrok ha Pedrog. Nag üjy an Tas Jones en Llanbedrog agria gens hei - na me naneyl!
Gerva:
als coast; oferyas priest; gylwis invited, summoned, called; oferen eucharist, mass; cres middle, centre; drefen because; wheffes sixth; morvorrow seaways; poos important, heavy, weighty; venja kens prefer; dewyethek bilingual; brossa bigger, > an brossa the biggest; dhallathas began; derivas to report, tell; me oya I knew; solabres already; güw spear; lies bledhen many years; warlergh~warlerth according to; pednsevyk prince; dascor to give up; managh monk; Wordhen Ireland; cadnas missionary, messenger; godhvedhys known; prierinses pilgrimage; adal dhe opposite, facing; nertha to strengthen; savonek standard; kevren link

Saturday, 15 November 2014

Feminine Nouns - gen Chris Parkinson


Feminine Nouns :  Learning the gender of nouns can be a pain if you’re not used to it. You can halve the problem by just learning which nouns are feminine – the rest of course will be masculine! There are two ways to help with this.

1. Imagine a scene with various feminine noun items in it. For example picture a vorr (fordh) (road) leading to a treveglos (village with a church). There is an eglos (church) with a gwedhen (tree) and a crows (cross) outside it. Next to the church is a field where a mos (girl) is sitting on a carrek (rock) by a venten (fenten) (well, spring) with a cath (cat) on her knee. Nearby is a bûgh (cow) and in the distance on the bre (hill) is a davas (sheep). Draw this picture, even if you’re not artistic, and remember the target feminine items.

 2. Native speakers of languages with mutations can learn feminine nouns by ear. You can too! Take a feminine noun like ‘cath’. After ‘an’, the definite article ‘the’, certain initial letters of feminine nouns mutate so we get ‘an gath’. Certain initial letters of following adjectives also mutate after feminine nouns. The common adjectives ‘broas’ (big) and ‘bian’ (small) do so, becoming ‘vroas’ and ‘vian’. To a native speaker ‘An gath vroas’ would sound right, and * ‘An cath broas’ would sound wrong. So try getting the following patterns into your ears by repeating them out loud.


carrek                    an garrek vroas                                 crows                    an grows vian

bre                         an vre vroas                                       bûgh                      an vûgh vian

tre                          an dre vian                                          treveglos             an dreveglos vian

davas                     an dhavas vian                                  delen (leaf)        an dhelen vroas

gwedhen             an wedhen vroas                             gaver (goat)       an aver vian


You can try this with every new feminine noun you come across. Good luck!

Story cott an stât laful a Kernow gen Paul Laity (1928-2001)


Termyn kensa hanter an degvas cansbledhen, an metêrn Athelstan a Wessex a fethas ahes an Kernowyon a wrüg ajon òja hedna, car dre hevel, dr’o anjei senjys dhe wodha dhodho aga leowta. E wrüg prononcia d’ressa Dowr Tamar formya an oryon tredh Gwlascor Wessex ha Gwlascor Kernow a veu kens. Nag eus dhen record sür a hanow an metêrn era rowlya en Kernow en dedhyow-na, boas Doniert an diwettha metêrn ella nei y henwel heb danjer (= daunjer), leb a verwis e’n vledhen 876. Spladn ew d’rüg an Sowson ysten aga rowl adreus Kernow, hag e’n diwedh Dûkys ha Yurlys Kernow a gemeras war an Metêrneth, o boas radn Keltyon ha radn Sowson. Termyn devedhyans an Normanow en 1066, an Yurl o Kernow creiys Cadoc, o ascor an teylû riel Brethonek, ader Sowsnek. Òja an conqwest, metêrn William a worras, en le Cadoc, y hanter broder, Robert Mortain. En deda, tho Yurlys Kernow rewlyjy an kethsam tiredh neb o a dermyn coth an auncyent tiredh riel Brethonek a Kernow. Onan an Yurlys a Kernow an termyn òja devedhyans an Normanow a wrüg kemena an tiredh-na dh’y er, neb o Metêrn Pow an Sowson e’n kettermyn.

An Duchy a Kernow a veu creatys gen Metêrn Edward III en 1337 der res a chartours. Tiredh an Duchy en Kernow o fondys war an tiredh riel coth Brethonek. Ken rothow tiredh aves a Kernow a veu kelmys dhe’n Duchy. Termyn gwreans an Duchy e veu declaryes dr’o üdn pòrpos dhe dascor dhe Kernow an “kensa onours” hei. Kensa Dûk Kernow, Edward an Pednsivik Dû, a veu gwres dûk vel mab kensa y sira, ha poyntys dhe dhoan rowl war Kernow pe va devedhys dhe oos pleyn. An Metêrn Edward a ros dhe’n dûk brossa radn y estât ha les en Kernow ha’n riel prerogativs - ha’n dûk a veu poyntys pecar dr’o va soveran en Kernow. En gwir eta, an tiredh coth a Kernow na veu besca senjys der vaner formal vel part Pow an Sowson. Na veu besca Act a Unyon o tòchya Kernow. Quît en contrary, rag Charturs an Duchy wrüg confirmya natûr diblans Kernow ha’n dûk vel rewlyas e’n tir-na. Rag gweres dhodho en whel governa Kernow an dûk wrüg poyntya Cussel, gen sodhogyon pecar’a re-na o poyntys dhe weres dhe Metêrn Pow an Sowson, ha sodhak creiys Arlòdh Warden an Stenegow.
Mab kensa genys an Metêrn a Pow an Sowon a vedha gwres Dûk Kernow dhia pa thew e genys, ha nag eus endûans car dr’eus en kever Pednsyvik Kembra. Pe nag eus Dûk, ma an Duchy o treylya arta dhe’n Metêrn Sowsnek, bes ma va triga vel tiredh diblans a senjy part an da prevath an Metêrn. (Gweller allowans Act an Proces an Cürun 1947). An Stenegow ew part kevrednek an Duchy a Kernow ha mons peth an Dûk. Na wrüg difeleby teller an Dûk en herwydh y Duchy a Kernow dhia 1337. Car dre hevel, tho rowlys gens stenoryon Kernow negys ga honan, ha senjys ganjans privelejys dres lies cansbledhen. Charturs Metêrn Jowan, 1201, ha Metêrn Edward I, 1305, wrüg godha privelejys dhe’n stenoryon d’ressans boas triys gens aga cortys enwejek anjei, keffres ha larjy qwitans an toll.
En 1497 an Kernowyon a rebellyas bedn an Metêrn Hedda VII, dreven ev dhe whilas derevel toll rag pe assault war Scotland (po Alban). Lû Kernow a hedhas Loundres, ha veu fethys ort Batel an Ros Dhû (Blackheath) ort diwa Mis Efan 1497. Leders an Kernowyon, Mihal Joseph ‘an Gov’, o gov dhor Lanhevran, ha Tobmas Flamank, den an laha dhor Bosvena, a veu cregys, tednys ha radnys en qwartednow en Tyburn.
En 1508, üdnek bledhen òja an Rebellyans a 1497, an Matern Hedda VII, òja pemont a vil pens, wrüg godha Chartour Pardon dhe stenoryon Kernow a wrüg provia na venja cawas effect lahys veth òja hebma a via bedn les stenoryon Kernow, pe na veu anjei comendys gen Senedh po Cuntellyans Stenoryon dewesys gen Maers ha Cussülyow an peder dre Stenek, hen ew Lostwydhyel, Lestevan, Trurû ha Helles. Car dre hevel, e veu Cuntellyanjow an Stenoryon dhia termyn dres co, ha na wrüg an Chartour an Pardon bes crefhe ha rei form dhe’n ynstitûcyon. Keniver dre Stenek era dascor whegh Stanator o sely Senedh an Stannary. Allowans a veu gwres rag dowis stenators mesk an wonisyjy sten a vettya en dyffrans ha rei cussel dhe’n stanators. Nag era gwir votya dhe’n wonisyjy.
An Senedhow o creiys gen Arlòdh Warden an Stenegow, garebma an Metêrn en Pow an Sowson poken Dûk Kernow. An Arlòdh Warden a venja reqwirya mers an peder dre Stenek ha ga cussülyow d’ressans drei pajar stanator ha d’ressa boas creiys warbar senedh, en lies en Lostwydhyel leb o, en effect, chif cita an Duchy a Kernow, poken en Trurû. An senedh a drigas en sedha terebo 1753 ha nag o y lahys gwithys stroytly dhe vaters an Stannary. Y actys era gawas assent an Metêrn po an Dûk.
En 1856 e veu dalva badnek tredh an Duchy ha’n Gurün o assoylys en favour an Duchy. E’n dhalva thera mellyes gwir palas rag monyow en dowrow subject dhe’n tid ha en heylyow. Crefhes veu an gwir en favour an Duchy gen Actys an Senedh en Loundres. E veu ûsurpyans ha forsakyans an thron a wrüg diwetha en boas Kernow ûsys vel conteth Pow an Sowson, bes ma an teller laful o triga diogel.

Sunday, 9 November 2014

Feminine Nouns 2 - gen Chris Parkinson

Feminine Nouns: Here is some more practice for learning which nouns are feminine, and what to do about it!
 
1.      Another set of common feminine nouns

kegin kitchen; tigen wallet; tesen cake, loaf; kenter nail; vorgh fork; padel pan; vorn oven; pel ball; lo spoon; oles hearth; scübyllen brush (small).

Group these items in a small drawing and remember which they are.

 
2.         With the definite article ‘an’, some, but not all of these will mutate the first letter like this: an gegin, an genter; an badel, an bel; An digen, an desen, i.e.those beginning K, P and T. But the following adjectives will mutate after all of them. So, try to get the following into your ears using broas and bian/vroas and vian (big and small):

An gegin vroas; an gisten vian; an genter vroas; an badel vian; an bel vroas; an oles vroas; an digen vian; an desen vroas; an vorn vroas; an vorgh vian; an lo vian; an scübyllen vian.
 
The adjectives dû (SWF/M du) (black), glan (clean) and coth (old) also mutate, to dhû, lan and goth after feminine nouns, so try using them as well, as you practise. Remember, you don’t need to write any of this down. You just need to hear it as you say the words out loud. Much easier!

Wednesday, 5 November 2014

Kehesnos - Equinox in Cornish


...Ma dew equinox po kehesnos e’n vledhen, an kensa en Mis Merh ha’n secònd en Mis Gwedngala dro dhe’n nessa bo an tryja jorna warn ügens ogasty. Pandra ens an dhiw geshesnos-na? Ma radn na or, martesen. Nag o nei oll astronomers na whath skientogyon po sciensydhyon. Eth ens an dhew dermyn e’n vledhen pa vedh kehes (of equal length) an jedh ha’n nos. Hen ew nag ew an jedh hirra vel an nos ha nag ew an nos hirra vel an jedh naneyl bes ema an keth hes dhe’n dhew, moy po le, - dewthek eur dhe’n jedh ha dewthek eur dhe’n nos. Eth ew hedna rag fra’ era nei o leverel kehesnos en Kernowek hedhyw ha equinox en Sowsnek ha Frenkek ha dyffrans tavosow erel. En gwir etta, an jedh a ell bos tabm hirra dhòrt refracyon an howl e’n element (Hen ew an atmospher po an ayrgelgh) bes nag ew hedna peth pur vroas. Thera nei o leverel an kydnyadh dhe dhallath ort an gehesnos en Mis Gwedngala. Ha lebmyn thew devedhys et o bres whath üdn lavar coth, - “En hav perh co gwav” - ha poynt a skians pur dhe les ew hedna, devry, rag en hav res ew dhen gwil agan moyha dhe vos parys rag an gwav ha na dal dhen nakevy oll an peth eus dhe wil. ... Ma hwath flourys teg e’n lowar vy, ha ticky-dewas - ha tòbm ew e’n dohajedh - bes cotta  - po berra - ew an dedhyow ha yeyn ew dhe vettin terwithyow ha nag eus scappya an gwav üjy tos, - yeyn, gleb ha gwenjek pecar’a brabm qwylken. Nag eus payntyes genam an daras derag ha ma toll e’n to an chei na wrüga vy mendya e’n gwaynten pa thera termyn. Nag eus diwa dhe’m whel vy! Res ew dhebm fonya dhe’n scaberyas-shymbla awedh ha comondya keunys rag an oles, ha nena pa vedh hager-awel - pa vedh an glaw o codha war an to nowedh-stanchys ha’n gwens o qweskel an daras nowedh-liwys, me a vedn sedha derag an tan gen badna gwin po cor po bolla a de...
 
Listen to a longer version by selecting Towlen 139 here: http://radyo.kernewegva.com/

Tuesday, 4 November 2014

Prederow adro dhe’n Ûnivers, Düw ha’n Bownans gen Daniel Prohaska


Ass ew hedna lavür cawrek! Kensa, jei a balas tùnnel e’n form a vesow, pur ogas dhe seytek mildîr en hester ha cowya dew cans kevelin hag ügens en dadn enep an grônd. Nena, jei a brovîas moy vel mil tennvenow sûpercondùctek, yeynhês dre donnys a hêliùm ha nîtrogen linüs. Lebmyn, ei a ell fistena perthiglow münys a vater dredh an biben ma üdnek mil treveth an secònd bys pan wrên’jei doas nes dhe dooth an golow, pajar ügens ha nownjek poynt naw naw naw naw naw pemp a’n cans, dhe voas còmpes.

War an diwa, fisegydhyon cresen whithrans CERN en Jenêva a recordyas gen sensors pur fin, fatel wre dehejy warbarth an prôtons neb üjy o neyja adro, ha tardha bera dhe gowas a berthiglow byhatna ke ve. Oll rag üdn pòrpos: m’allen’jei crodra mes üdn berthygel na vedh den veth nevra o qweles ha neb, dres hanter cansvledhen, na veu tra veth bes tarosvan dismygys dre vathematik. En mis Gorefen 2012 e clowas an norves del veu sowen crodra dredh an pil taclow coth a berthiglow üjy o resek, ha nanj ew nebes misyow an fisegydhyon Peter Higgs ha François Englert a gavas an Pris Nobel racto en Fisek. Bes prag ew hedna mater a Dhüw, bo an ûnivers? An berthygel ma, lebmyn creiys perthygel-Higgs, a veu kens henwys Perthygel Düw, hag en theory e talvia dhedhy disqwedhes fatel entras mater bera dhe’n ûnivers. Cabm pella ew hebma en certan dhe gonvedhes an ûnivers ha’y dhallathvos, fatel üjy ha prag üjy va o hothfy, a be le veu nei o toas ha pe le era nei o moas. Ma an qwestyon coth o toas dhe’gan bres mar qwreffa discüdhansow skiensek en contrary dhe grejyansow relejyon ha’n qwestyon a po dhe nei res a Dhüw, a dhüwes, a dhüwow bo a relejyon veth oll. 

Albert Einstein, fondyer theory an relativita, a gowsas a Greâtor discler neb ev a hanwas “An Gwas Coth”, saw en ünsel rag m’alla referrya mes a’n colors dhe varthow cosmik a remayn heb styryans. E’n barth arall, ev a senjis del ve len cryjyans ‘ogas ha flohel’ hag ‘ascorr a wanegredh mab den’. Bo Stephen Hawking, onan a’n fisegydh moyha nojedhek a’gan dedhyow nei: Nanj ew teyr bledhen e veu dhodho odhom a glerhe del ell y dybyansow fisegel gwül heb conceyt a greâtor ha del wrüg an ûnivers y greâtya y honan ‘a dra veth’. Thera skila sempel dr’wrüg cawas y scrifednow cottha ettans dadhel theologel maga ta: lien skians an bobel a venja gwertha polta gwell!

So, piw, po pandra ew Düw dhana? Martesen thew e metafor mab den m’allo an bobel omgonfortya en ynterpretâcyon sûpernatûrek an anstyradow? Ha, üjy hedna o mênya, dhe voy del ella nei styrya en sciensek, dhe le ew odhom dhe nei a Dhüw avel ynterpretâcyon rag an anstyradow? Ëtho, üjy Düw o pianhe? Bo ew ‘Düw’ ’gan hanow rag desîner codnyk an ûnivers? Eus towl mêster rag an ûnivers? Saw an tremydnow metafisik, nag ew cas an towl mêster, moy po le, tra a vern mar teffe’nei ha sòpposya, ader üdn ûnivers en üdnek, bes ûniversys diniver. Mar po niver heb worfen a vesow, na via marth bian dhen gweles bownans skentel egina pub teller? 
Nag ew res dhewgh handla fardel a gartednow dhe gawas a hes bydd an colodnow (the ace of cards).

Ma nebes fisegydhyon o predery del dalvia boas whath gwell tybyans an mùltivers dhe düs ew whansek tro ha divinita: mar po e’n gwir Düw ollgallojek, rag fraga venja va gwedhra dhe bojya adro en gonis en üdn ûnivers ‘bian ha trawesy’, pecar ha’gan peth nei? Na via moy wirhevelep dhe voas rag mùltivers a’n dalleth?

Nag ew possibel kemeres skians downha anodho, bes martesen thew res dhe’nei gwül dhe’n convedhes dr’üjy an bes o poas en sempel, ... poran pecar’a hedna! Haval gen flogh pan üjy va o convedhes nag üjy an menedhyow nena dhe voas cramblys. Fatel ella nei handla an convedhes ma, ew, martesen, lebma ma ’gan dismygyans mab den o toas bera dhe’n gwary. Era nei o toas nes dhe’n mater-ma a wolok a skiens bo fedh? Hebma ew viaj neb eus dhe’nei oll, kettep onan ahanan, odhom a lavürya. Thera nei o terevel agan ûnivers agan honan gen agan bryjyow nei.